Muri Paruwasi ya Nyakinama, kuwa 2 Gashyatare 2025 hashinzwe Ihuriro ry’ Inshuti za Bikira Mariya Umwamikazi wa Fatima(Fraternité Notre Dame de Fatima)

Ku cyumweru tariki ya 2 Gashyantare 2025, intumwa z’Ihuriro ry’Inshuti za Bikira Mariya Umwamikazi wa Fatima muri Paruwasi Katedrale ya Ruhengeri, Bwana SAGAHUTU Everigiste na Bwana NIYIREMA Cyprien bazindukiye muri Pruwasi ya Nyakinama bahumvira Misa ya Mbere yatangiye sa moya za mugitondo. Muri iyo Misa, mugihe cy’amatangazo abari baje gutangiza Ihuriro bahawe umwanya basobanurira abakristu muri make ubutumwa bwa Fraternité Notre Dame de Fatima n’icyo igamije. Kubera ko umwanya wari muto, abakristu bashishikarijwe ko Misa nihumuza abashaka ubusobanuro burammbuye no kwinjira mu Ihuriro basanga intumwa za Fraternité Notre Dame de Fatima muri stade ya Paruwasi bakaganirizwa ku buryo burambuye.

Padiri HABANABAKIZE Alfred ukorera ubutumwa muri Paruwasi ya Murama niwe wayoboye igitambo cya Misa, Padiri yashishikarije abakristu kwita no kumva neza ubutumwa Umubyeyi Bikira Mariya yatangiye Fatima kuko ubwo butumwa butureba no muri ibi bihe. Yabwiye abakristu ko abizi neza ko abakristu babarizwa muri Diyosezi ya Ruhengeri kubabwira Bikira Mariya ari ibintu byoroshye kuko bafite umwihariko wo kumwiyambaza.

Misa ihumuje abakristu bashatse gusobanukirwa ku buryo burambuye bahuriye n’intumwa za Fraternité Notre Dame de Fatima muri stade ya Paruwasi maze bahabwa ubusobanuro burambuye. Nyuma yo gutangiza isengesho, abitabiriye basobanuriwe neza Fraternité Notre Dame de Fatima, ubutumwa ifite n’icyo igamije. Abakristu baranyuzwe babaza n’ibibazo bibafasha gusobanukirwa kurushaho. Muri uwo mwanya abitabiriye bari ku kigero cya 99.9% bose biyemeje kwinjira muri Fraternité Notre Dame de Fatima.

Nyuma yo kubona abiyemeje kuba muri Fraternité Notre Dame de Fatima, hatowe komite igizwe na Perezida n’umwungirije, Umunyamabanga n’umwungirije, Umubitsi n’umwungirije n’abajyanama batanu. Perezida mu ijambo yavuze amaze gutorwa, yavuze ko Bikira Mariya ari Mama bityo ko ubutumwa yatangiye i Fatima bugomba gubahwa kandi bukagezwa henshi hashoboka. Yongeyeho ko Bikira Mariya agenda yiyereka abantu mu buryo butandukanye, bityo ko kumwiyambaza bituma ubukristu bukomera. Nyuma twasoje tuzirikana iyibukiro rya 4 mu Mayibikiro yo Kwishima dore ko kuri icyo cyumweru wari umunsi wa Yezu aturwa Imana mu Ngoro Ntagatifu.

Komite yatowe:

Perezida: MUDAHOGORA Philomène

V/C Perezida: NYIRAMATEGEKO Olive

Umunyamabanga: NYIRANSABIMANA Jeanine

V/C Umunyamabanga: MUKAMAZERA Ester

Umubitsi: NYIRABAHIRE Valentine

V/C Umubitsi: BITONDERUBUSA Alphonsine

Abajyanama:

1. UWIMANA Juditte
2. NIKOBATUYE Bernadette
3. NYIRANKORAYONZI Jacqueline
4. AKIMANIZANYE Angelique
5. UZAMUKUNDA Clementine

Byakusanyijwe na NIYIREMA Cyprien